Ytre Hardangerfjorden

Ytre Hardangerfjorden marine verneområde ligg ytst i Hardangerfjorden og omfattar areal i kommunane Tysnes, Stord og Kvinnherad i Vestland. Verneområdet dekkjer eit sjøareal på om lag 67,8 km² og vart verna 13. februar 2026.

Den viktigaste naturfaglege kvaliteten er gradienten frå ein spesiell undersjøisk morenerygg med nasjonal verneverdi og ned til blautbotn på stort djup i Husnesfjorden. Sterk straum over moreneryggen gir gode tilhøve for eit rikt og mangfaldig dyreliv, mellom anna korallar, svampar, store førekomstar av lofotsjølilja Rhizocrinus lofotensis og den sjeldne hornkorallen Isidella lofotensis. Området er òg eit regionalt viktig gytefelt for torsk og viktige oppvekst- og beiteområde for kysttorsk. Hardangerfjorden har stor verdi i forskingssamanheng, og området skal tene som referanseområde for forsking og overvaking.

Verneforskrifta forbyr tiltak som kan skade verneverdiane. Dette gjeld mellom anna utfylling, mudring, legging av røyrleidningar og kablar, utslepp av forureining og oppankring. Vegetasjon og dyreliv er verna mot skade og øydelegging, og planting eller utsetjing av organismar er forbode. Ferdsel med båt, fiske etter havressurslova og drift av eksisterande anlegg er likevel tillate. Forvaltingsstyresmakt er Statsforvaltaren i Vestland.