Krossfjorden

Krossfjorden marine verneområde ligg i Øygarden, Austevoll, Bjørnafjorden og Bergen kommunar i Vestland. Verneområdet vart oppretta 13. februar 2026 og dekkjer eit sjøareal på om lag 192,6 km². Grensa mot land følgjer djupnekote 2 m under sjøkartnull, med unntak av indre delar av Krossfjorden der grensa går mot djupnekote 100 m. Ytre avgrensing følgjer 200 m under sjøkartnull ut mot Nordsjøen.

Krossfjorden er ein relativt open fjord med eit ope kystområde utanfor. Verneverdiane er knytte til det biologiske mangfaldet av naturtypar, flora og fauna på og ved botnen. Området inneheld mellom anna korallrev, særprega kalkalgar og store areal med tareskog som aldri har vore kommersielt hausta. Det er også eit viktig oppvekst- og beiteområde for eit mangfald av marine artar. Krossfjorden er blant dei best dokumenterte og undersøkte kystområda i Noreg, og er difor godt eigna som referanseområde for forsking og overvaking.

Verneforskrifta forbyr tiltak som kan skade verneverdiane, mellom anna skade på vegetasjon og dyreliv, etablering av anlegg, utfylling, mudring, forureining og forsøpling. Ferdsel med fartøy og hausting av viltlevande marine ressursar er i hovudsak tillate, men hausting av tang, tare og andre marine planter samt reketråling i kartfesta referanseområde er unnteke. Statsforvaltaren i Vestland er forvaltingsstyresmakt.