Dalsfjorden

Dalsfjorden marine verneområde ligg i indre del av Dalsfjorden, frå Dalsfjordbrua i vest til Osen i aust, og dekkjer eit sjøareal på 10,7 km². Området ligg i Sunnfjord, Fjaler og Askvoll kommunar i Vestland.

Fjorden er særeigen ved at han er forma av innlandsisen sine utgravingar gjennom fleire istider. Han har spesielle straumforhold og ein uvanleg kombinasjon av stor ferskvasstilførsel og artsrike hardbotnsamfunn. Inst i fjorden ligg eit nasjonalt verdfullt estuarområde, og fjorden er eit viktig oppvekst- og beiteområde for eit mangfald av marine artar. Området skal òg tene som referanseområde for forsking og overvaking.

Verneområdet vart oppretta ved forskrift 13. februar 2026, med heimel i naturmangfoldloven. Vernet knyter seg til vassøyla og sjøbotnen. Vegetasjon som tang og tare er verna mot skade, planting er forbode, og dyrelivet i sjø er verna mot skade og øydelegging. Det er forbode å setje i verk fysiske inngrep som utfylling, mudring, boring, sprenging og deponering av masse, samt å sleppe ut ureina ballastvatn eller avløpsvatn. Ferdsel med båt er tillate, og hausting av viltlevande marine ressursar er i hovudsak tillate etter havressurslova, med unntak for skjel og vegetasjon. Statsforvaltaren er forvaltingsstyresmakt.