Lurefjorden og Lindåsosane

Lurefjorden og Lindåsosane er eit marint verneområde på om lag 70 km² i Alver og Austrheim kommunar i Vestland fylke. Området vart verna 23. juni 2020 med heimel i naturmangfoldloven.

Området utgjer eit særeige fjord- og pollsystem med lågt oksygeninnhald og til dels ekstreme miljøforhold. Det er kjent for spesielle førekomstar av den djuptlevande kronemaneten Periphylla periphylla, ishavsåte Calanus glacialis og ei eiga sildestamme. Området har stor verdi for marin forsking og overvaking.

Verneforskrifta forbyr tiltak som kan skade verneverdiane, mellom anna utfylling, mudring, uttak av masse, forureining og utsetting av framande organismar. Tang, tare og anna marin vegetasjon er verna mot skade og hausting. Ferdsel med båt, fritidsfiske og jakt er likevel tillate. Det kan søkjast om dispensasjon for mellom anna legging av kablar, småbåthamner, vedlikehaldsmudring og akvakultur som ikkje er i strid med verneføremålet. Statsforvalteren i Vestland er forvaltingsmyndigheit.