Nordre Lia

Nordre Lia naturreservat ligg sørvendt på rasmark og blokkmark ved foten av ei blankskurt fjellside under Lifjell, innerst i Kleivgrend i Fyresdal kommune. Reservatet er på om lag 530 dekar og vart verna 1. desember 2017.

Området har særskilt naturvitskapleg verdi på grunn av førekomst av boreonemoral blandingsskog med parti av alm-lindeskog, rein edellauvskog med ask, hassel og alm, og eldre ospeholt med grove gadd og læger. Det er også registrert fleire truga og sjeldsynte artar av lav og sopp knytt til daud ved.

Verneforskrifta forbyr all aktivitet som kan skade verneverdiane. Det er mellom anna forbode å skade vegetasjon eller dyreliv, setje opp bygningar eller anlegg, bruke kjemiske middel, forureine eller forsøple området. Bålbrenning og større arrangement er òg forbode. Motorisert ferdsel, riding og sykling utanfor eksisterande sti er ikkje tillate.

Sanking av bær og matsopp, beiting, jakt og fiske etter gjeldande lovverk er likevel tillate. Den historiske turstigen «Bispevegen», som går gjennom den nedre delen av reservatet, kan merkast og vedlikehaldast som før.