Osen

Osen naturreservat ligg ved utløpet av Gaularvassdraget ved Dalsfjorden i Sunnfjord kommune. Reservatet vart freda ved kongeleg resolusjon 19. desember 1997 og dekkjer eit totalareal på om lag 527 dekar, der berre 17 dekar er landareal. Området er altså dominert av vatn.

Området er ein viktig kvile- og rasteplass for våtmarksfugl under trekket, og om lag 40 artar er registrerte. Andefugl dominerer, og canadagås nyttar staden som mytestad og overvintringsplass. Dei spesielle salinitetstilhøva i Osen gjev opphav til uvanlege vegetasjonssoneringar. Av særleg botanisk interesse er stilkvasshår, ein plante som berre er kjend frå tre andre lokalitetar i Skandinavia.

Verneformålet er å ta vare på våtmarksområdet med naturleg vegetasjon og dyreliv, deltaet som naturtype, og dei botaniske verdiane knytte til undervassenger med stilkvasshår.

Verneforskrifta forbyr all skade på vegetasjon og dyreliv, inngrep som kan endre naturlege tilhøve, motorisert ferdsel på vatnet og lågtflyging under 300 meter. Fiske, bruk av naust og motorbåt i samband med busetnad og næring er likevel tillate. Forvaltningsstyresmakta kan gje løyve til visse tiltak, som felling av skadeleg vilt og rydding av vegetasjon i tråd med forvaltningsplan. Statsforvalteren i Vestland er forvaltningsstyresmakt.