Todalsøran

Todalsøran naturreservat ligg i Surnadal kommune i Møre og Romsdal og vart freda 8. november 2002. Reservatet dekkjer eit totalareal på om lag 626 dekar, fordelt på 379 dekar land og 247 dekar sjø.

Området er eit relativt urørt elvedelta med strandenger og rikt fugleliv. Dei fleste større elvedelta i Møre og Romsdal og elles i landet er bygde ned, og Todalsøran representerer difor eit unikt naturdokument. Dei viktigaste botaniske verneverdiane er knytt til strandengene, der ulike grasartar og andre planter veks under vekslande påverknad frå sjøvatn og ferskvatn. Dette gjev særeigne økosystem og eit rikt biologisk mangfald. Nokre vegetasjonstypar av forstrand, salteng og brakkvannseng vert vurderte som noko trua. Innførte artar som rynkerose og hagelupin er ei utfordring, då dei spreier seg på kostnad av den naturlege vegetasjonen.

Verneføremålet er å ta vare på eit relativt urørt elvedelta med botaniske, zoologiske og geomorfologiske verneverdiar.

Verneforskrifta fastset at vegetasjon og dyreliv er freda mot skade og øydelegging, og at nye plante- og dyreartar ikkje må førast inn. Det er forbode å setje i verk tiltak som kan endre naturmiljøet, og motorferdsel på land er ikkje tillate. Tradisjonelt beite og jordbruksdrift på eksisterande dyrka mark er likevel tillate. Statsforvaltaren i Møre og Romsdal er forvaltningsmynde for reservatet.