Dyraheio

Dyraheio landskapsvernområde med biotopvern ligg i Suldal og Bykle kommunar og dekkjer eit areal på om lag 304 kvadratkilometer. Området er eit særmerkt fjellområde dominert av eit høgfjellsplatå med nokre stølsdalar, næringsrike fyllittbergartar og store område med kalkkrevande fyllittvegetasjon.

Dei rike botaniske lokalitetane i Stranddalen er mellom dei fremste verneverdiane i området. Her veks bergjunker, ein art som er klassifisert som nær truga på den nasjonale raudlista, og som berre finst på nokre få stader i landet. Liknande verdifulle botaniske lokalitetar finst også i Hongsnuten og Raudnuten. Området har dessutan store verneverdiar knytt til landskap, kulturminne etter støling og heibeiting, og er eit viktig leveområde for den sørlegaste villreinstamma i Europa.

Verneforskrifta vart fastsett ved kongeleg resolusjon 26. september 1997. Forskrifta slår fast at det ikkje må gjerast inngrep som vesentleg kan endra landskapets art eller karakter. Nydyrking, treslagsskifte og snauhogst er forbode. Bergjunker og plantesamfunn med denne arten er særskilt verna mot skade og øydelegging. Motorisert ferdsel i utmark og vassdrag er forbode, og flyging lågare enn 300 meter over bakken er heller ikkje tillate. Større organiserte arrangement er forbode. Vanlege landbruksaktivitetar og vedlikehald av eksisterande bygningar og anlegg er likevel tillate innanfor nærare fastsette rammer. Verneområdestyret for Setesdal-Vesthei-Ryfylkeheiane er forvaltningsstyresmakt for området.