Stølsheimen

Stølsheimen landskapsvernområde er verna ved kongelig resolusjon av 21. desember 1990, med heimel i lov om naturvern. Området er om lag 377 km², av dette om lag 4 km² sjøareal, og strekkjer seg over kommunane Høyanger, Vik, Modalen, Vaksdal og Voss i Vestland fylke.

Området omfattar eit særmerkt vestlandsk fjell- og fjordlandskap som går frå fjord til høgfjell. I nord stuper terrenget bratt ned mot fjorden, i vest dominerer avrunda landformer, medan aust er prega av små parallelle nord-sørgåande dalar. Mange vatn skaper variasjon i landskapet. Berggrunn i vest er gneis, medan aust har kambrosilurisk fylitt. Raudberget er oppbygd av serpentinitt. Stølsområda er ein viktig og karakteristisk del av landskapet.

Føremålet med vernet er å ta vare på landskapet med kulturminne, kulturlandskap og naturmiljø som er lite påverka av tekniske inngrep, samstundes som området kan nyttast til landbruk, friluftsliv, jakt og fiske.

Forskrifta forbyr inngrep som vesentleg kan endre landskapets art eller karakter, mellom anna oppføring av bygningar og anlegg, bygging av vegar, vassdragsregulering og motorferdsle på land og innsjøar. Snauhogst er berre tillate i samråd med forvaltningsstyresmakta og berre i flater under 5 dekar. Det er gjort unntak for mellom anna utmarksbeite, jakt og fiske, vedlikehald av eksisterande anlegg og naudsynt transport i jord- og skogbruk. Forvaltningsstyresmakta kan gje løyve til mellom anna restaurering av stølshus, oppføring av turisthytter og merking av nye turistruter.