Kuøyni, Skagøyni, Teistholmen og Teistholmskjeret

Kuøyni, Skagøyni, Teistholmen og Teistholmskjeret naturreservat ligg ved Rongevær, ei øygruppe lengst nordaust i Austrheim kommune i Vestland. Reservatet er todelt og omfattar Skagøyna og Kuøyna i nord og Teistholmen og Teistholmskjeret i sør. Det totale arealet er 375 dekar, der 214 dekar er landareal og resten sjøareal.

Reservatet vart oppretta i 1987 med føremål om å sikre gode vilkår for hekkande sjøfugl. Utgangspunktet for vernet var to mellomstore hekkekoloniar med gråmåse, med om lag 40 par på Teistholmen og 50 par på Kuøyna. Det hekka òg teist på Teistholmen. Gråmåsekoloniane flytta på eit tidspunkt mellom 1981 og 1987, og sidan vernet vart oppretta har berre nokre få par svartbak hekka i reservatet. Grågås har vore registrert hekkande på Kuøyna sidan minst 1989. Delar av Kuøyna og Skagøyna er registrert som naturtypelokalitetar med kystlynghei av lokal verdi.

Kystlyngheia er i moderat attgroing, og mink kan ha vore eit problem for sjøfuglar i området over tid.

Verneforskriften slår fast at all vegetasjon og alt vilt er freda mot skade og øydelegging. Jakt, fangst og bruk av skytevåpen er forbode i perioden 1. april til 9. september. I tida 15. april til 31. juli er det forbod mot ilandstiging og ferdsel på holmar og skjer i ei sone ut til 50 meter frå land, og lågflyging under 300 meter er heller ikkje tillate i denne perioden. Camping og teltslaging er forbode. Unntak gjeld mellom anna for tradisjonell beiting, vedlikehald av eksisterande bygningar og ferdsel knytt til yrkesfiske.