Håvarden og Klubben

Håvarden og Klubben naturreservat ligg i Alver kommune i Vestland, like nordvest for oljeraffineriet på Mongstad. Reservatet er todelt og omfattar den nordaustlege delen av øya Håvarden med ein holme og nokre skjer, samt Klubben, ein holme på nordaustsida av Håvarden. Samla areal er 228 dekar, der 121 dekar er landareal og resten sjøareal.

Reservatet vart oppretta i 1987 med formål om å sikre gode vilkår for hekkande sjøfugl. På vernetidspunktet fanst her koloniar av sildemåse, fiskemåse og terner. I ettertid har desse koloniane forsvunne, og det har knapt hekka sjøfugl i området etter at vernet vart etablert. På Klubben er vegetasjonen grasdominert med god naturtilstand, medan Håvarden er dominert av kystlynghei som er i attgroing med einer, blåbærlyng og grov røsslyng. Det finst òg spreidde felt med sitkagran og bergfuru.

Ifølgje verneforskrifta er all vegetasjon freda mot skade og øydelegging, og alt vilt er freda mot uroing. I hekketida frå 15. april til 31. juli er det forbod mot ilandstiging og ferdsel på holmar og skjer, og mot lågtflyging under 300 meter. Jakt, fangst og bruk av skytevåpen er forbode frå 1. april til 9. september. Det er heller ikkje tillate å setje i verk tiltak som kan endre dei naturgitte tilhøva, som oppføring av bygningar, vegar, drenering eller bruk av kjemiske middel.