Synnøy

Synnøy naturreservat ligg i Alver kommune i Vestland fylke. Det er ei vegetasjonskledd øy i Hoplandsosen, og reservatet omfattar både landareal på 45 dekar og eit omkringliggjande sjøareal på 72 dekar.

Utgangspunktet for vernet var ein sjøfuglkoloni med om lag 100 par fiskemåse og 20 par makrellterne registrert i 1977. Bestandane gjekk sidan kraftig tilbake, og i dag hekkar berre eit fåtal par svartbak, grågås og ærfugl i reservatet. Attgroing og mink er rekna som dei viktigaste negative påverknadsfaktorane. Det er sett i gang tiltak med sviing av vegetasjon og beiting med sau, samt fjerning av mink.

Verneformålet er å sikre gode vilkår for sjøfuglar og ta vare på ein viktig hekkelokalitet med tilhøyrande plante- og dyreliv.

Etter verneforskrifta er all vegetasjon og alt vilt freda mot skade og øydelegging. Jakt, fangst og bruk av skytevåpen er forbode i perioden 1. april til 9. september. I tida 15. april til 31. juli er det forbod mot ilandstiging og ferdsel i ei sone på 50 meter frå land, og lågflyging under 300 meter er heller ikkje tillate i denne perioden. Camping og teltslaging er forbode. Tiltak som kan endre dei naturgitte tilhøva, som bygging, utfylling eller bruk av kjemiske middel, er ikkje tillate.