Ådnøy

Ådnøy naturreservat ligg i Alver kommune i Vestland, og omfattar sørvestspissen av Ådnøyna med omkringliggjande sjøareal i Fensfjorden. Reservatet er på totalt 25 dekar, der 8 dekar er landareal og 17 dekar er sjøareal.

Grunnlaget for vernet var ein stor og tett blandingskoloni med terner: i 1980 vart det registrert 70 par raudnebbterne og 20 par makrellterne. Siste registrering av hekkande sjøfugl var i 1991. I dag er store delar av reservatet tilgrodd med skog, noko som gjer det lite eigna som hekkestad. Det er òg truleg mink i området.

Reservatet vart verna ved kongeleg resolusjon 3. april 1987. Føremålet er å sikre gode vilkår for sjøfugl og ta vare på ein viktig hekkelokalitet med tilhøyrande plante- og dyrearter.

Verneforskrifta fastset at all vegetasjon er freda mot skade og øydelegging, og at alt vilt er freda mot uroing. I perioden 15. april til 31. juli er det forbod mot ilandstiging og ferdsel i ei sone på 50 meter frå land, og lågflyging under 300 meter er ikkje tillate. Jakt, fangst og bruk av skytevåpen er forbode frå 1. april til 9. september. Camping og teltslaging er ikkje tillate. Tiltak som kan endre dei naturgitte tilhøva, som oppføring av bygningar, drenering eller utfylling av masse, er òg forbode.