Vågsskjeret

Vågsskjeret naturreservat er eit lite skjer like ved land utanfor Risaosen, nordvest i Lurefjorden i Alver kommune. Reservatet vart verna 3. april 1987 og dekkjer eit totalareal på om lag 15 dekar, der berre 2 dekar er landareal.

Føremålet med vernet var å sikre ein hekkelokalitet for sjøfugl, særleg terner. Ved verninga i 1987 fanst det ein blandingskoloni med makrellterne, raudnebbterne og fiskemåse på staden. Ternene forsvann raskt, og det er ikkje registrert hekking i reservatet sidan det vart verna. Skjeret er noko prega av attgroing med blåbærlyng og unge lauvtre, og mink er rekna som eit mogleg trugsmål.

Verneforskrifta slår fast at all vegetasjon er freda mot skade og øydelegging, og at alt vilt, inkludert sjøpattedyr, hi, reir og egg, er freda. Det er forbod mot jakt, fangst og bruk av skytevåpen i perioden 1. april til 9. september. I perioden 15. april til 31. juli er det forbod mot ilandstiging og ferdsel på skjeret og i ei sone på 50 meter frå land, og lågflyging under 300 meter er heller ikkje tillate i denne perioden. Det er òg forbod mot inngrep som kan endre dei naturgitte tilhøva, som oppføring av bygningar, drenering og utfylling av masse. Forvaltningsansvaret ligg hos Statsforvalteren i Vestland.