Stridsholmen

Stridsholmen naturreservat er ein liten holme i nordlege del av Lurefjorden i Austrheim kommune, Vestland. Reservatet vart oppretta ved kgl.res. 3. april 1987 og omfattar eit totalareal på om lag 49 dekar, der 12 dekar er landareal og resten sjøareal.

Formålet med vernet er å sikre gode vilkår for sjøfugl og ta vare på ein viktig hekkelokalitet. Utgangspunktet for vernet var ein hekkekoloni med sildemåse, fiskemåse og gråmåse, men desse artane har i løpet av dei siste tiåra forsvunne som hekkefuglar. Attgroing etter at beiting tok slutt er rekna som ei hovudårsak. Skjøtselstiltak vart gjennomført i 2010, men det er behov for permanente tiltak med beitedyr.

Etter verneforskrifta er all vegetasjon freda mot skade og øydelegging, og alt vilt er freda mot uroing. Det er forbod mot ilandstiging og ferdsel i ei sone på 50 meter frå land i perioden 15. april til 31. juli, og lågflyging under 300 meter er òg forbode i denne perioden. Jakt, fangst og bruk av skytevåpen er forbode frå 1. april til 9. september. Det er ikkje tillate å setje i verk tiltak som kan endre dei naturgitte tilhøva, som oppføring av bygningar eller anlegg. Unntak gjeld mellom anna for tradisjonell beiting, militær verksemd, fiske for yrkesfiskarar og skjøtselstiltak godkjent av forvaltningsstyresmakta, som er Statsforvalteren i Vestland.