Ullebroten

Ullebroten naturreservat ligg i Øygarden kommune i Vestland og omfattar holmen Ullebroten med eit kringliggjande sjøareal på om lag 50 meter frå strandlina. Reservatet dekkjer totalt 39 dekar, der 7 dekar er landareal.

Utgangspunktet for vernet var ein koloni på 21 par raudnebbterne i 1980, og det hekka òg steinvendar på holmen. Begge artane er no borte, og reservatet er ikkje lenger ein viktig hekkeplass for sjøfugl. Det er ikkje registrert tekniske inngrep i reservatet, og naturtilstanden er tilsynelatande god. Mink er ikkje påvist, men finst truleg i området.

Reservatet vart oppretta ved kongeleg resolusjon 3. april 1987. Føremålet er å sikre gode vilkår for sjøfuglar og ta vare på ein viktig hekkelokalitet med tilhøyrande plante- og dyrearter.

Verneforskrifta forbyr mellom anna all skade på vegetasjon og vilt, og det er ikkje tillate å setje i verk tiltak som kan endre dei naturgitte tilhøva. I perioden 15. april til 31. juli er det forbod mot ilandstiging og ferdsel på holmar og skjer i ei sone ut til 50 meter frå land, og lågflyging under 300 meter er heller ikkje tillate i denne perioden. Camping og teltslaging er forbode. Unntaka frå reglane gjeld mellom anna militær verksemd, tradisjonell beiting, fiske for manntalsførte yrkesfiskarar og naudsynte forvaltnings- og sikringstiltak.