Kråko

Kråko naturreservat ligg i Tysnes kommune i Vestland fylke og omfattar ei gras- og lyngkledd holme på austsida av Huglo, ut mot Hardangerfjorden. Reservatet er på totalt 135 dekar, der 69 dekar er landareal. Berggrunnen består av grønskifer.

Verneformålet er å sikre gode vilkår for sjøfugl og ta vare på ein viktig hekkelokalitet. Grunnlaget for vernet var ein stor fiskemåsekoloni med om lag 70 par, samt 15–18 par hekkande gråmåse. Etter fredinga har måsebestanden gått kraftig tilbake, og i 2011 hekka berre 2 par svartbak på holmen. Området er i dag sterkt prega av attgroing med einer, og predasjon frå mink har tidvis vore eit problem.

Forskrifta forbyr mellom anna all skade på vegetasjon, inngrep som endrar naturforholda, og ferdsel på land i perioden 15. april til 31. juli. Lågtflyging under 300 meter er også forbode i denne perioden. Unntak gjeld mellom anna for tradisjonell beiting, militær verksemd, redningsteneste og yrkesfiskarar med fiskeregistrerte båtar. Forvaltningsstyresmakta kan gjennomføre skjøtselstiltak og gje dispensasjon i særlege høve. Reservatet er forvalta av Statsforvaltaren i Vestland.