Måksteinen og Tovo

Måksteinen og Tovo naturreservat ligg i Bømlo kommune i Vestland fylke og vart verna ved kgl.res. 3. april 1987. Reservatet omfattar øya Måksteinen og skjæret Tovo, med eit kringliggjande sjøareal ut til ca. 50 meter frå strandlina. Totalt areal er 164 dekar, der 68 dekar er landareal.

Måksteinen er ein nærast vegetasjonslaus holme ytst i skjergarden, medan Tovo er eit skvalpeskjer. Området vart opphavleg verna på grunn av store hekkande bestandar av svartbak, sildemåse og gråmåse. Over tid har bestandane av stormåsar gått noko ned, men toppskarv har etablert seg som hekkefugl sidan minst 1997, og i 2011 vart det registrert om lag 20 par. Same år vart det òg funne 3 reir av storskarv, ein nyetablert koloni og den andre for arten i Hordaland. Teist hekkar med ein liten, men stabil bestand på om lag 2 par.

Føremålet med vernet er å sikre gode vilkår for sjøfuglar og ta vare på ein viktig hekkelokalitet med tilhøyrande plante- og dyrearter.

Verneforskrifta fastset at all vegetasjon og alt vilt er freda mot skade og uroing. Jakt, fangst og bruk av skytevåpen er forbode i perioden 1. april til 9. september. I tida 15. april til 31. juli er det forbod mot ilandstiging og ferdsel på holmar og skjer, samt lågflyging under 300 meter. Camping og teltslaging er forbode. Det er ikkje tillate å setje i verk tiltak som kan endre dei naturgitte tilhøva i området.