Trøytarosskjeret

Trøytarosskjeret naturreservat ligg i Bømlo kommune i Vestland fylke og vart verna 3. april 1987. Reservatet er eit lite, lågt og blankskurt skjer i skjerma farvatn like utanfor tettstaden Finnås. Det totale arealet er om lag 8 dekar, der berre 1 dekar er landareal.

Skjeret vart verna på grunnlag av ein hekkekoloni for makrellterne. I 1979 hekka 18 par her, og i 1981 var talet oppe i 22 par. Etter 1981 er det ikkje registrert hekkande terner eller andre sjøfuglartar på skjeret. Ein kjent påverknad er predasjon frå mink.

Verneformålet er å sikre gode vilkår for sjøfuglar og ta vare på ein viktig hekkelokalitet med tilhøyrande plante- og dyrearter.

Verneforskriften slår fast at all vegetasjon er freda, og at alt vilt, inkludert sjøpattedyr, hi, reir og egg, er verna mot skade og uroing. Jakt, fangst og bruk av skytevåpen er forbode i perioden 1. april til 9. september. Det er ilandstegingsforbod og ferdselsforbod i ei sone på 50 meter frå land i perioden 15. april til 31. juli, og lågflyging under 300 meter er heller ikkje tillate i denne perioden. Fysiske inngrep og endringar av naturforholda er ikkje tillate. Forvaltningsansvaret ligg hos Statsforvalteren i Vestland.