Møkstra-Grøningana

Møkstra-Grøningane naturreservat ligg i Austevoll kommune i Vestland fylke og vart verna 3. april 1987. Reservatet omfattar ein låglendt holme like søraust for Møkster, med eit samla areal på om lag 50 dekar, der ca. 25 dekar er landareal og resten sjøareal ut til 50 meter frå strandlina.

Holmen er frodig og graskledd i dei sentrale delane, og er ein kjend og viktig hekkelokalitet for sjøfugl. Dei viktigaste artane er grågås og svartbak. Grågåsbestanden har tatt seg opp dei seinare åra, medan svartbakbestanden har gått tydeleg ned, frå 75 par i 1993 til 19 par i 2011. Det er òg registrert gråmåse i reservatet. Mink er ein kjend trussel, og det er gjennomført felling av villmink som ledd i forvaltinga av området.

Verneføremålet er å sikre gode vilkår for sjøfugl og ta vare på ein viktig hekkelokalitet med tilhøyrande plante- og dyreliv.

Verneforskrifta slår fast at all vegetasjon er freda, og at alt vilt, inkludert sjøpattedyr, reir og egg, er verna mot skade og uroing. Jakt, fangst og bruk av skytevåpen er forbode frå 1. april til 9. september. I perioden 15. april til 31. juli er det forbod mot ilandstiging og ferdsel på holmar og skjer i ei sone ut til 50 meter frå land, og lågflyging under 300 meter er heller ikkje tillate i denne perioden. Camping og teltslaging er forbode. Tradisjonell beiting og naudsynt ferdsel i samband med denne er likevel tillate.