Trollskjeret

Trollskjeret naturreservat ligg i Kvinnherad kommune i Vestland fylke. Det er eit lite skjer nordaust for Store Lauvøy, i sundet mellom Valen og Halsnøy. Reservatet vart oppretta ved kgl.res. 3. april 1987 og dekkjer totalt 12 dekar, der berre om lag 1 dekar er landareal.

Verneformålet er å sikre gode vilkår for sjøfugl og ta vare på ein viktig hekkelokalitet. Utgangspunktet for vernet var ein hekkekoloni med makrellterne og raudnebbterne. Kolonien var aktiv i kring 20 år, med opptil 80–90 hekkepar på det meste. Ternene har vore fråverande sidan slutten av 1990-talet, men fiskemåsen har hatt ei positiv utvikling, med 13 hekkepar registrert i 2011.

Etter verneforskrifta er all vegetasjon freda mot skade og øydelegging, og alt vilt, inkludert sjøpattedyr, hi, reir og egg, er freda mot skade og unødig uroing. Jakt, fangst og bruk av skytevåpen er forbode i perioden 1. april til 9. september. I tida 15. april til 31. juli er det forbod mot ilandstiging og ferdsel på skjeret og i ei sone på 50 meter frå land. Lågtflyging under 300 meter er også forbode i denne perioden. Det er ikkje tillate å setje i verk tiltak som kan endre dei naturgitte tilhøva i området.