Kubbholmen

Kubbholmen naturreservat ligg i Bjørnafjorden kommune i Vestland, og omfattar ei lita holme med kringliggjande sjøareal ut til 50 meter frå strandlina. Reservatet er på totalt 13 dekar, der berre 1 dekar er landareal.

Utgangspunktet for vernet var ein koloni på 12 par makrellterne registrert i 1979. Det har likevel ikkje hekka terner på holmen etter at vernet vart oppretta. Øvst på holmen er det framleis litt grasvegetasjon med preg av gjødsling frå sjøfugl.

Føremålet med vernet er å sikre gode vilkår for sjøfugl og ta vare på ein viktig hekkelokalitet med tilhøyrande plante- og dyrearter. Verneforskrifta frå 1987 slår fast at all vegetasjon er freda, og at vilt, reir og egg er verna mot skade og uroing. I perioden 15. april til 31. juli er det forbod mot ilandstiging og ferdsel på holmen og i ei sone på 50 meter rundt, og lågflyging under 300 meter er òg forbode i denne perioden. Det er heller ikkje tillate å setje i verk tiltak som kan endre dei naturgitte tilhøva, som oppføring av bygningar eller anlegg. Forvaltningsstyresmakt er Statsforvalteren i Vestland.