Eggvær

Eggvær naturreservat ligg på ei svært eksponert og vêrhard holme på vestsida av søre Bømlo i Bømlo kommune. Reservatet er totalt 130 dekar, der 65 dekar er landareal og resten sjøareal ut til 50 meter frå strandlina.

Området vart verna i 1987 på grunn av ein stormåsekoloni med 25 par svartbak og 15 par gråmåse, og ligg dessutan i eit viktig myteområde for ærfugl. Verneformålet er å sikre gode vilkår for hekkande sjøfugl og ta vare på ein viktig hekkelokalitet med tilhøyrande plante- og dyrearter.

Ifølgje verneforskrifta er all vegetasjon freda mot skade og øydelegging, og alt vilt inkludert sjøpattedyr er freda mot skade og unødig uroing. Det er forbod mot jakt, fangst og bruk av skytevåpen i perioden 1. april til 9. september. I tida 15. april til 31. juli er det forbod mot ilandstiging og ferdsel på holmar og skjer innanfor 50-metersona, og lågflyging under 300 meter er heller ikkje tillate i denne perioden. Camping og teltslaging er forbode. Det er òg forbod mot tiltak som kan endre dei naturgitte tilhøva, som oppføring av bygningar, drenering, utfylling av masse eller bruk av kjemiske middel. Statsforvaltaren i Vestland er forvaltningsmyndigheit for reservatet.