Trættebleikja

Trættebleikja naturreservat ligg nord for Espevær i Bømlo kommune i Vestland. Det er ein liten, rund og delvis flat steinete holme med knapp strandvegetasjon. Holmen ligg vêrhardt til, og svaberga er tydeleg påverka av fuglegjødsel.

Utgangspunktet for vernet var ein hekkekoloni med raudnebbterne, med 45 par registrert i 1981. Ternene har likevel ikkje hekka her etter at området vart verna i 1987. I 2011 var einaste registrerte hekkande sjøfugl 4 par svartbak.

Reservatet vart oppretta ved kgl.res. 3. april 1987 og dekkjer eit totalareal på om lag 28 dekar, der 4,5 dekar er landareal og resten sjøareal. Føremålet med vernet er å sikre gode vilkår for sjøfugl og ta vare på ein viktig hekkelokalitet.

Verneforskrifta fastset at all vegetasjon er freda, og at alt vilt, inkludert sjøpattedyr, hi, reir og egg, er verna mot skade og uroing. I perioden 15. april til 31. juli er det forbod mot ilandstiging og ferdsel på holmen og i ei sone på 50 meter frå land. Lågflyging under 300 meter er òg forbode i denne perioden. Camping og teltslaging er ikkje tillate. Jakt, fangst og bruk av skytevåpen er forbode frå 1. april til 9. september.