Hillekalven og Pasholmen

Hillekalven og Pasholmen naturreservat ligg i Klosterfjorden i Kvinnherad kommune og omfattar fleire små holmar og skjer på nordsida av øya Hille. Reservatet vart oppretta ved kgl.res. 3. april 1987 og dekkjer eit areal på 133 dekar, der 15,5 dekar er landareal.

Verneformålet er å sikre gode vilkår for sjøfugl og ta vare på ein viktig hekkelokalitet. Utgangspunktet for vernet var ein koloni på 100 par fiskemåse og 75 par terner i 1980. Artssamansetjinga har endra seg mykje sidan då, og sjøfuglhekking har vorte stadig sjeldnare. I 2011 var det berre 3 par svartbak som hekka i reservatet. Ærfugl og nokre ikkje-hekkande skarvar nyttar området jamleg.

Etter verneforskrifta er all vegetasjon freda mot skade og øydelegging, og alt vilt er freda mot forstyrring. I perioden 15. april til 31. juli er det forbod mot ilandstiging og ferdsel på holmane og i ei sone på 50 meter frå land. Lågtflyging under 300 meter er òg forbode i denne perioden. Jakt, fangst og bruk av skytevåpen er forbode frå 1. april til 9. september. Camping og teltslaging er ikkje tillate. Tradisjonell beiting og nødvendig ferdsel i samband med denne er likevel tillate, det same gjeld vedlikehald av eksisterande bygningar og ferdsel knytt til yrkesfiske.