Raunøy, Langøy, Skardholmen, Storholmen og Høgholmen

Raunøy, Langøy, Skardholmen, Storholmen og Høgholmen naturreservat ligg på nordaustsida av Fensfjorden ved innløpet til Masfjorden i Masfjorden kommune. Reservatet omfattar ein liten flik av Raunøy, sørlege del av Langøy og heile Skardholmen, Storholmen og Høgholmen. Holmane er dominert av gras- og lynghei med mykje bart fjell. Totalt areal er 258 dekar, der 90 dekar er landareal og resten sjøareal.

Området vart verna i 1987 med føremål å sikre gode vilkår for hekkande sjøfugl. Utgangspunktet for vernet var ein god stormåsekoloni med sildemåse og gråmåse, samt hekking av begge terneartane og grågås. I dag hekkar framleis nokre par grågås, men måsar og terner er så godt som borte som hekkefuglar. Reservatet er vurdert som truga.

Etter verneforskrifta er all vegetasjon freda mot skade og øydelegging, og alt vilt er freda mot forstyrring. I perioden 15. april til 31. juli er det forbod mot ilandstiging og ferdsel på holmar og skjer, og mot lågtflyging under 300 meter. Jakt, fangst og bruk av skytevåpen er forbode frå 1. april til 9. september. Camping og teltslaging er ikkje tillate. Tradisjonell beiting og nødvendig ferdsel i samband med denne er likevel tillate, det same gjeld ferdsel for manntalsførte yrkesfiskarar i forbodsperioden.