Olvondo

Olvondo naturreservat ligg i Bømlo kommune i Vestland og omfattar holmen Olvondo vest for Lykling, med eit kringliggjande sjøareal ut til 50 meter frå strandlina. Reservatet er på totalt 350 dekar, der 186 dekar er landareal. Det vart verna ved kgl.res. 3. april 1987, og forvaltinga er lagt til Statsforvalteren i Vestland.

Verneformålet er å sikre gode vilkår for hekkande sjøfugl og ta vare på ein viktig hekkelokalitet. Holmen har store, flate, graskledde parti, men er òg steinete og bratt. Utgangspunktet for vernet var ein god førekomst av hekkande sjøfugl med mange artar og individ. Rundt 1977 hekka mellom anna svartbak, sildemåse, gråmåse, fiskemåse og raudnebbterne her. Sidan har bestandane gått noko ned, men Olvondo er framleis eit viktig sjøfuglområde. Toppskarv og grågås har etablert seg i nyare tid.

Verneforskrifta forbyr all skade på vegetasjon og dyreliv. Jakt, fangst og bruk av skytevåpen er forbode i perioden 1. april til 9. september. I tida 15. april til 31. juli er det forbod mot ilandstigning og ferdsel innanfor ei sone på 50 meter frå land, og lågflyging under 300 meter er heller ikkje tillate i denne perioden. Camping og teltslaging er forbode. Tradisjonell beiting og naudsynt ferdsel i samband med denne er likevel tillate, og det same gjeld ferdsel for manntalsførte yrkesfiskarar i ferdselsforbodsperioden.