Laksholmen

Laksholmen naturreservat ligg like ved land utanfor Hauglandshella, sørvest på Askøy i Vestland fylke. Reservatet vart oppretta ved kgl.res. 3. april 1987 og omfattar totalt 26 dekar, der om lag 5 dekar er landareal og resten sjøareal.

Verneformålet er å sikre gode vilkår for sjøfugl og ta vare på ein viktig hekkelokalitet. Grunnlaget for vernet var ein koloni med 30–35 par fiskemåse og 17–18 par terner registrert i 1980. Desse bestandane forsvann raskt, og det har ikkje hekka sjøfugl med kolonipreg her sidan vernet vart oppretta. I 2014 vart det registrert nokre par svartbak, sildemåse og tjeld på holmen.

Ein negativ påverknad var at holmen vart planta til med sitkagran i 1984. Grana vart fjerna vinteren 2009/2010 som eit skjøtselstiltak, men det kjem framleis opp nye småplantar som må lukas. Mink er òg ein potensiell trussel i området.

Verneforskrifta slår fast at all vegetasjon og alt vilt er freda. Det er forbode å gå i land eller ferdast i ei sone på 50 meter frå land i perioden 15. april til 31. juli. Lågtflyging under 300 meter er òg forbode i denne perioden. Tiltak som kan endre dei naturgitte tilhøva, som bygging, utfylling eller bruk av kjemiske middel, er ikkje tillate. Forvaltningsstyresmakt er Statsforvalteren i Vestland.