Vestre og Indre Mågabøl, Myrbærholmen og Kvitingen

Vestre og Indre Mågabøl, Myrbærholmen og Kvitingen naturreservat ligg i Austevoll kommune i Vestland fylke, vest for Møkster. Reservatet vart oppretta ved kgl.res. 3. april 1987 og omfattar øyane Vestre og Indre Mågebøl, Myrbærholmen og Kvitingen, med kringliggjande sjøareal ut til ca. 50 m frå strandlina. Samla areal er 380 dekar, der 159 dekar er landareal. Fuglelivet på Myrbærholmen har vore freda sidan 1953.

Holmane er generelt høge og bratte med kløfter og skar. Vegetasjonen er grasdominert, men stadvis finst det fuglegjødsla fjørekoll-samfunn. Utgangspunktet for vernet var gode førekomstar av sjøfugl. Toppskarv har hekka her sidan minst 1899/1900, og andre viktige artar er svartbak, sildemåse, gråmåse, fiskemåse, terner og teist. Bestandsutviklinga for desse artane har vore negativ, sterkast for sildemåse og fiskemåse. Reservatet ligg òg i utkanten av eit viktig myteområde for ærfugl i Hordaland.

Verneforskrifta slår fast at all vegetasjon og alt vilt er freda mot skade og øydelegging. Jakt, fangst og bruk av skytevåpen er forbode frå 1. april til 9. september. I perioden 15. april til 31. juli er det forbod mot ilandstiging og ferdsel på holmar og skjer, og mot lågtflyging under 300 m. Det er heller ikkje tillate å setje i verk tiltak som kan endre dei naturgitte tilhøva, som oppføring av bygningar, drenering eller opplagring av avfall. Unntak gjeld mellom anna for militær verksemd, oppsyn, tradisjonell beiting og ferdsel knytt til yrkesfiske.