Lurekalven

Lurekalven naturreservat ligg i Alver kommune i Vestland og omfattar den nordvestlege delen av Lurekalven, ein langstrakt holme nord for Lygra i Lurefjorden. Reservatet vart oppretta ved kongeleg resolusjon 3. april 1987 og dekkjer eit areal på 156 dekar, der 105 dekar er landareal.

Utgangspunktet for vernet var ein hekkekoloni med 40–45 par sildemåse, samt eit mindre tal hekkande gråmåse og fiskemåse. Kolonien var sist aktiv i 1980, og det er ikkje registrert hekkande sjøfugl i reservatet etter at det vart verna. Området er òg registrert som kystlynghei med svært høg verdi og inngår i driftsområdet til Lyngheisenteret på Lygra. Kystlyngheia er i aktiv skjøtsel med beiting og lyngbrenning.

Verneforskrifta slår fast at all vegetasjon er freda mot skade og øydelegging, og at alt vilt, inkludert sjøpattedyr, hi, reir og egg, er freda mot skade og uroing. Jakt, fangst og bruk av skytevåpen er forbode i perioden 1. april til 9. september. I tida 15. april til 31. juli er det forbod mot ilandstiging og ferdsel i ei sone på 50 meter frå land, og lågflyging under 300 meter er heller ikkje tillate i denne perioden. Camping og teltslaging er forbode. Tradisjonell beiting og nødvendig ferdsel i samband med denne er likevel tillate, det same gjeld sanking av bær og sopp utanfor ferdselsforbodstida.