Hovsøy, Låtersøy, Melne, Melneklubben, Lyngsøy, Oksøy og Raudholmane

Hovsøy, Låtersøy, Melne, Melneklubben, Lyngsøy, Oksøy og Raudholmane naturreservat, ofte kalla Sørøyane, ligg i Bømlo kommune i Vestland. Reservatet vart oppretta ved kongeleg resolusjon 3. april 1987 og omfattar sju holmar med eit samla areal på om lag 1 100 dekar, der 450 dekar er landareal og resten sjøareal.

Holmane er blant dei mest eksponerte og vêrharde på Vestlandet, vendt mot Nordsjøen i vest og Bømlafjorden i sør. Berggrunnen er forriven med mange sprekker som gjev gode tilhøve for hekking. Sørøyane er det viktigaste hekkeområdet for sjøfugl i Hordaland, med store koloniar av toppskarv og teist, og gode bestandar av måsar og terner. Ein koloni med storskarv er eit nyare innslag, den første i sitt slag i Hordaland. Sjøarealet mellom holmane er også viktig for sjøfugl utanom hekketida.

Verneføremålet er å sikre gode vilkår for sjøfuglane og ta vare på ein viktig hekkelokalitet med tilhøyrande plante- og dyreliv.

Etter verneforskrifta er all vegetasjon freda, og alt vilt medrekna sjøpattedyr, hi, reir og egg er verna mot skade og uroing. I perioden 15. april til 31. juli er det forbod mot ilandstiging og ferdsel på holmane og i ei sone på 50 meter frå land. Lågtflyging under 300 meter er heller ikkje tillate i denne perioden. Camping og teltslaging er forbode. Jakt, fangst og bruk av skytevåpen er forbode frå 1. april til 9. september. Det er ikkje tillate å setje i verk tiltak som kan endre dei naturgitte tilhøva i området.

Unntak gjeld mellom anna for militær verksemd, redningsteneste, tilsyn med fyrlykta på Raudholmen, tradisjonell beiting og ferdsel i samband med yrkesfiske.