Prestnesholmen

Prestnesholmen naturreservat ligg i Kaldestadvika like vest for Husnes i Kvinnherad kommune. Reservatet vart oppretta ved kgl.res. 3. april 1987 og omfattar eit lite skjer med kringliggjande sjøareal ut til ca. 50 meter frå strandlina. Totalt areal er om lag 14 dekar, der berre om lag 1 dekar er landareal.

Grunnlaget for vernet er ein hekkekoloni med makrellterne. Bestanden har variert mykje over åra, men reservatet har hatt dokumentert ungeproduksjon i fleire enkeltår enn dei fleste andre sjøfuglreservat i Hordaland. Det beste registrerte året var 1997, med rundt 60 hekkepar. Av og til har det også hekka nokre få par raudnebbterne og 2-3 par fiskemåse i kolonien. Mink er rekna som det mest alvorlege trugsmålet mot kolonien.

Føremålet med vernet er å sikre gode vilkår for sjøfuglane og ta vare på ein viktig hekkelokalitet. Verneforskrifta forbyr all skade på vegetasjon og vilt, og det er ikkje tillate å setje i verk tiltak som kan endre dei naturgitte tilhøva. I perioden 15. april til 31. juli er det forbod mot ilandstiging og ferdsel på holmen og i ei sone på 50 meter rundt, og lågflyging under 300 meter er heller ikkje tillate i denne perioden. Camping og teltslaging er forbode. Unntak gjeld mellom anna for militær verksemd, oppsyn, skjøtsel og manntalsførte yrkesfiskarar.