Låge Islendingen

Låge Islendingen naturreservat ligg like nord for øya Storestonga i Fensfjorden i Austrheim kommune. Skjeret er så lågt at det nærast må reknast som eit skvalpeskjer. Reservatet vart oppretta ved kgl.res. 3. april 1987 og dekkjer eit totalareal på 35 dekar, der 7 dekar er landareal og resten sjøareal.

Utgangspunktet for vernet var ein ternekoloni på om lag 15 par i 1980, truleg raudnebbterne, samt eit par med steinvendar. Det er ikkje registrert hekkande terner i reservatet etter 1980, og steinvendar er heller ikkje observert sidan den tid. Området og dei grunne sjøområda rundt er likevel viktige næringssøksområde for sjøfugl i vinterhalvåret, særleg for skarv, ærfugl, havelle og svartand.

Føremålet med vernet er å sikre gode vilkår for sjøfugl og ta vare på ein viktig hekkelokalitet med tilhøyrande plante- og dyrearter. Verneforskrifta forbyr all skade på vegetasjon og vilt, og det er ikkje tillate å setje i verk tiltak som kan endre dei naturgitte tilhøva. I perioden 15. april til 31. juli er det forbod mot ilandstiging og ferdsel på holmar og skjer i ei sone ut til 50 meter frå land, og lågflyging under 300 meter er heller ikkje tillate i denne perioden. Camping og teltslaging er forbode. Yrkesfiskarar med fiskeregistrerte båtar har likevel rett til ferdsel i forbodsperioden.