Litle Gåsøy, Skarvøy og Store Lambholmen

Litle Gåsøy, Skarvøy og Store Lambholmen naturreservat, ofte kalla Gåsøyane naturreservat, ligg utanfor Telavåg i Øygarden kommune. Reservatet vart oppretta 3. april 1987 og omfattar tre holmar med kringliggjande sjøareal, totalt 202 dekar der 69 dekar er landareal.

Verneformålet er å sikre gode vilkår for hekkande sjøfugl og ta vare på ein viktig hekkelokalitet. Området er kjend for hekkande måsar, særleg svartbak, sildemåse og gråmåse, samt raudnebbterner. Ternene var fråverande ei periode, men hekka igjen i 2011. Naturtilstanden er generelt god, men førekomst av mink er ei utfordring for sjøfuglar i området.

Verneforskriften fastset at all vegetasjon og alt vilt er freda mot skade og uroing. Det er forbod mot ilandstiging og ferdsel på holmane i perioden 15. april til 31. juli, og lågflyging under 300 meter er heller ikkje tillate i denne perioden. Det er òg forbod mot jakt, fangst og bruk av skytevåpen frå 1. april til 9. september. Camping og teltslaging er forbode. Tiltak som kan endre naturforholda, som oppføring av bygningar eller anlegg, er ikkje tillate. Unntak gjeld mellom anna for militær verksemd, tradisjonell beiting og ferdsel knytt til yrkesfiske.