Einsetmyra

Einsetmyra naturreservat ligg på søraustsida av Aspøya i Tingvoll kommune, Møre og Romsdal, og vart freda ved kongeleg resolusjon 13. desember 1996. Reservatet er på om lag 100 dekar og er avgrensa av dyrka mark, vegar og E-39.

Området er ei eksentrisk høgmyr utan tresetjing, med tydeleg lagg og kantskog. Myra er ombrotrof, det vil seie at ho berre får næring frå nedbøren. Vegetasjonen er dominert av tuevegetasjon med gråmose, og vanlege plantar er rome, tettegras, klokkelyng, kvitmyrak og pors. Formålet med fredinga er å ta vare på eit lite, men velfungerande høgmyrområde med verdi som nasjonalt typeområde.

Fredningsforskrifta slår fast at all vegetasjon er freda mot skade og øydeleggjing, og at det ikkje er tillate å innføre nye planteartar eller fjerne planter frå området. Det er heller ikkje tillate å gjennomføre tiltak som kan endre dei naturgjevne tilhøva, som drenering, oppfylling, gjødsling eller bruk av plantevernmiddel. Motorisert ferdsel er forbode. Tradisjonell beiting, sanking av bær og matsopp og vedlikehald av eksisterande telekabel er likevel tillate. Forvaltingsansvaret ligg hos Statsforvalteren i Møre og Romsdal.