Vermedalen

Vermedalen naturreservat ligg i Vermedalen i Rauma kommune i Møre og Romsdal, og grensar i nord og vest til Romsdalen landskapsvernområde. Reservatet er på om lag 1 052 dekar og vart freda ved kgl.res. 17. desember 1999. Området inneheld bjørkeskog, furuskog og myr, og delar av skogen ligg langs elva Verma som er ein del av eit verna vassdrag.

Furuskogen veks på moreneryggar og grunnlendte parti og kan karakteriserast som bærlyngfuruskog med krekling, røsslyng og blåbær. Området har stor plantegeografisk interesse, mellom anna på grunn av førekomsten av ulvelav, ein sjelden og austleg lavart. Dette er eit av dei vestlegaste funna av arten i Noreg. I tillegg finst det lav på bakken, med innslag av lavfuruskog med grå og lys reinlav. Skjegglavartar som furuskjegg og mørkskjegg er gjennomgåande. På nokre tre veks svartkjuke, knuskkjuke og kreftkjuke. Skogen er lite rørt, med tre opp mot 500 år gamle. Av fuglar er mellom anna dvergfalk, tretåspett og såerle observert i området.

Formålet med fredinga er å sikre eit skogområde med alt naturleg plante- og dyreliv. Verneforskrifta forbyr mellom anna hogst, innføring av nye plante- og dyrearter, motorisert ferdsel, bygging av vegar og anlegg, og organiserte arrangement. Sanking av bær og matsopp, jakt, fiske og beiting på eit nivå som ikkje skader fredingsformålet er likevel tillate. Forvaltningsstyresmakta er Nasjonalparkstyret for Reinheimen.