Hisåsen

Hisåsen naturreservat ligg på nordaustspissen av Ertvågøya i Aure kommune i Møre og Romsdal, og vart freda ved kongeleg resolusjon 17. desember 1999. Reservatet er på 2933 dekar og utgjer eit skoglandskap på ein markert ås nord for riksvegen.

Området er eit typeområde for myrrik, næringsfattig kystfuruskog med eit tydeleg oseanisk og fuktig preg. Mosearten storstylte er karakteristisk for dette preget. Den vanlegaste vegetasjonstypen er røsslyng-blokkebærfuruskog. Myrane er av fastmattetypen med noko rikare tilhøve, mellom anna med trådstorr. Det er funne skog i aldersfase med tre over 250 år gamle. Området er artsfattig, men har stor verdi som spesialområde for denne vegetasjonstypen.

Formålet med fredinga er å sikre skogområdet med alt naturleg plante- og dyreliv, særleg den gamle kystfuruskogen og vekslinga mellom skogsamfunn og myrtypar som er karakteristisk for lågtliggjande skog nær kysten.

Fredingsforskrifta forbyr mellom anna hogst, inngrep i vegetasjon og dyreliv, bygging av anlegg og vegar, motorisert ferdsel, og organisert bruk som idrettsarrangement. Sanking av bær og matsopp, jakt, fiske og beiting på eit nivå som ikkje skadar fredingsformålet er likevel tillate. Statsforvalteren i Møre og Romsdal er forvaltningsmyndigheit for reservatet.