Nesvåg

Nesvåg naturreservat ligg i Sokndal kommune i Rogaland, om lag 4 km vest for Hauge i Dalane. Reservatet er på 17 dekar og omfattar ei grunnlendt sørhelling med bergrunn av anortositt.

Området er verna for å ta vare på den største kjende kristtornforekomsten i Sør-Rogaland. Det er om lag 40 kristtorntre, der det største er eit hotre på 9 meter med ein omkrins på 175 cm. Kristtorn inngår i ei blanding med annan varmekjær vegetasjon, og det spirer no opp rikeleg med småplantar. Andre karakteristiske artar er knegras, sølvbunke, fagerperikum og blåmunke. Området grensar til eikeskog i vest og lynghei i aust, og er ein del av eit beitelandskap under gradvis tilgroing.

Området er klassifisert som trua, og det er behov for skjøtselstiltak og utarbeiding av skjøtselplan.

Ifølgje verneforskrifta er vegetasjon og dyreliv freda mot skade og øydelegging. Det er forbode å fjerne planter, innføre nye planteartar eller setje i verk tiltak som kan endre naturmiljøet. Motorisert ferdsel er forbode, og organiserte arrangement er ikkje tillate utan særskilt løyve. Tradisjonell beiting og jakt er likevel tillate. Forvaltningsstyresmakta kan etter søknad gje løyve til klipping og utnytting av kristtorn, noko som er aktuelt med tanke på tradisjonell pyntegrøntproduksjon.