Bjørklund

Bjørklund naturreservat ligg i Suldal kommune i Rogaland, om lag 4 km nordaust for Hebnes på nordsida av Sandsfjorden. Reservatet er på 73 dekar og vart freda ved kongeleg resolusjon 13. oktober 2000.

Området er prega av produktiv, høg- og rettstamma blåbærfuruskog med eit tydeleg innslag av kristtorn. Kristtorn finst spreidd i store delar av reservatet, med 2–3 m høge småtre. I eit bekkedrag i sørvest er det ein samanhengande underskog med 2–5 m høge kristtorntre. Sørvest for dette søkket ligg eit mindre areal med beiteeng eller slåtteng med nokre få store og lauvrike kristtorntre. Berggrunnen er fyllitt. Verneformålet er å ta vare på ein av dei større kristtornbestandane som ligg lengst inne i fjordane i Ryfylke, i ein uvanleg finvaksen furuskog.

Fredingsforskrifta forbyr mellom anna skade på vegetasjon og dyreliv, innføring av nye planteartar, motorisert ferdsel og tiltak som kan endre naturmiljøet. Sanking av bær og matsopp, jakt og tradisjonell beiting er likevel tillate. Forvaltningsstyresmakta kan gje løyve til organisert verksemd, og kan gjennomføre skjøtsel for å fremje verneformålet. Suldal kommune er forvaltningsmyndigheit for reservatet.