Ratvikvatnet

Ratvikvatnet naturreservat ligg mellom Lerstadvegen og Ratvikåsen i Ålesund kommune og dekkjer eit areal på om lag 65 dekar. Kjerneområdet er eit lite, grunt og næringsrikt vatn med frodig vassvegetasjon og eit breitt takrøyrbelte. Rundt vatnet er det urteenger, krattsoner og fuktbjørkeskog.

Området er særleg viktig for fugleliv. Dvergdykkaren, som er nasjonalt sjeldsyn, hekkar årleg med 1–2 par i vatnet. Tidvis hekkar òg sivsporv, myrrikse, sivhøne og mogeleg sothøne her. Den raudlista vassriksa overvintrar her nesten kvart år. Takrøyrvegetasjonen er den viktigaste overnattingsplassen i Møre og Romsdal for låvesvale i trekktida, med flokkar på 5 000–10 000 fuglar. I vatnet finst trepigga stingsild, og det er oppgang av ål i bekken. Bjørke-viersumpskogen er truleg den best utvikla sumpskoglokaliteten i Ålesund, og det er funne fleire nasjonalt raudlista soppartar i området.

Reservatet vart freda ved kgl.res. 27. mai 1988. Føremålet er å ta vare på eit viktig våtmarksområde med tilhøyrande plantesamfunn, fugleliv og anna dyreliv. Fredingsføresegnene forbyr mellom anna all skade på vegetasjon, jakt og fangst, motorisert ferdsel og inngrep som kan endre dei naturgjevne tilhøva. Så lenge det er ope vatn, er all ferdsel i reservatet forbode. Forvaltingsmyndigheit er Statsforvaltaren i Møre og Romsdal.