Lyngholman

Lyngholman naturreservat ligg på Harøya i Ålesund kommune, Møre og Romsdal, og vart freda ved kgl.res. 27. mai 1988. Reservatet dekkjer eit areal på om lag 659 dekar, av dette om lag 353 dekar sjøareal. Området er også omfatta av Ramsarkonvensjonen som eit internasjonalt viktig våtmarkssystem.

Området er ein viktig hekkeplass for vadefugl og beite- og overvintringsplass for andre våtmarksartar. Det er knytt både ornitologiske og botaniske interesser til området, særleg til det store strandengsystemet med grunne bukter, småholmar og store tidevassareal. Strandengene er middels artsrike, men har eit godt utval av artar som er sjeldne i fylket. Landskapet er småkupert med lyngmark, myr og beitemark ikring strandengene. Området er urørt og eignar seg godt for undervisning og forsking.

Utfordringane for området er gjengroing med sitkagran, forstyrring frå nærliggande hyttefelt og strandsøppel.

Ifølgje verneforskrifta er all vegetasjon freda mot skade og øydelegging, og nye planteartar må ikkje innførast. Alt vilt, inkludert hi, reir og egg, er freda, og jakt og fangst er forbode. Det er ikkje tillate å setje i verk tiltak som kan endre dei naturgjevne tilhøva, som til dømes oppføring av bygningar, drenering, utfylling eller bruk av kjemiske plantevernmiddel. Motorisert ferdsel til lands og lågtflyging under 300 meter er forbode, det same gjeld camping og teltslaging. Etablert jordbruksdrift som slått og beiting, fiske og motorferdsel i næringsføremål er likevel tillate.