Tågdalen

Tågdalen naturreservat ligg i Nordmarka i Surnadal kommune, Møre og Romsdal, og dekkjer eit areal på om lag 1460 dekar. Reservatet er dominert av kalkrike bergartar som fyllitt og grønnskifer, og har ein variert vegetasjon der myr utgjer om lag halvparten av arealet.

Dei naturfaglige verdiane er særleg knytte til den rike og varierte floraen. Det er registrert nesten 300 planteartar, mellom anna 16 orkideartar. Ein finn både rik og ekstremt rik myr, kalkskog og kjeldevegetasjon. Myrene og engskogane har tidlegare vore nytta til utmarkslått, og ein tredjedel av reservatet kan karakteriserast som god slåttemark. Utan aktiv skjøtsel er det fare for at verdfulle delar av floraen går tapt.

Fredingsformålet er å ta vare på eit nasjonalt verdfullt myrområde med uvanleg rik og interessant flora. Forskrifta forbyr all skade på vegetasjon, inngrep som endrar naturforholda, og motorisert ferdsel. Tradisjonell beiting, sanking av bær og matsopp, og motorferdsel på snødekt frosen mark er likevel tillate. Forvaltingsmyndigheit er Statsforvalteren i Møre og Romsdal, som også kan gje løyve til skjøtselstiltak og gjere unntak i særskilde tilfelle.