Sekkjedalstjørn

Sekkjedalstjørn naturreservat ligg sør på Fedje i Fedje kommune, Vestland fylke. Reservatet er på 31 dekar og omfattar kystlynghei og myr. Det er det einaste sjøfuglreservatet i Hordaland som ikkje ligg i direkte tilknyting til sjøen.

Utgangspunktet for vernet var ein tett blandingskoloni med raudnebbterne og fiskemåse som vart registrert i 1979. Bestandsutviklinga har dessverre vore svært negativ, og i dag er reservatet tomt for hekkande sjøfugl. Andre artar som er påvist hekkande i reservatet er raudstilk, enkeltbekkasin, stokkand, krikkand og ærfugl.

Reservatet vart verna ved kongeleg resolusjon 3. april 1987. Føremålet med vernet er å sikre best moglege vilkår for sjøfuglane i området og å ta vare på ein viktig hekkelokalitet med dei plante- og dyreartar som naturleg høyrer til her.

Verneforskrifta slår fast at all vegetasjon er freda mot skade og øydelegging, og at alt vilt, deira hi, reir og egg er freda mot skade og uroing. Jakt, fangst og bruk av skytevåpen er forbode frå 1. april til 9. september. I same periode er det forbod mot ilandstiging og ferdsel i ei sone ut til 50 meter frå land, samt lågflyging under 300 meter. Camping og teltslaging er forbode. Tiltak som kan endre dei naturgjevne tilhøva, som bygging, drenering og bruk av kjemiske middel, er heller ikkje tillate. Forvaltningsansvaret ligg hos Statsforvaltaren i Vestland.