Flatholmen

Flatholmen naturreservat ligg i Stad kommune i Vestland, og omfattar ei flat holme mellom øyane Barmen og Silda sør i Sildegapet. Reservatet er om lag 96 dekar, der 27 dekar er landareal og resten sjøareal. Området er verna sidan 28. mai 1993.

Holmen har fin gras- og strandeng med sauebeite, og er ein viktig hekkelokalitet for sjøfugl. Hekkande artar inkluderer ærfugl, tjeld, steinvendar, sildemåse, gråmåse, svartbak, raudnebbterne, myrsnipe, vipe og småspove. Flatholmen utgjer, saman med Sildekruna og Lysholmen, det nordlege tyngdepunktet for stormåsar i fylket. Området er òg eit viktig beiteområde for grågås og kanadagås.

Verneformålet er å gje sjøfuglane gode og trygge livsvilkår og å ta vare på ein viktig hekkelokalitet med naturleg tilhøyrande vegetasjon og dyreliv.

Etter verneforskrifta er all vegetasjon og alt dyreliv verna mot skade og øydelegging. Det er forbode å setje i verk tiltak som kan endre dei naturlege tilhøva. I perioden 1. april til 31. juli er det forbod mot ilandstiging og ferdsel på land og i ei sone på om lag 50 meter frå land. Lågtflyging under 300 meter er òg forbode. Tradisjonelt sauebeite og taretråling i perioden 1. august til 31. mars er likevel tillate.