Tennøyane

Tennøyane naturreservat ligg i Bremanger kommune i Vestland, der fjordarmane Midtgulen og Nordgulen møtast. Reservatet består av to graskledde øyar på til saman om lag 151 dekar landareal, pluss eit omliggande sjøareal på om lag 197 dekar.

Området er særleg verdifullt som hekke- og overvintringsområde for sjøfugl. Blant påviste hekkande artar finn ein ærfugl, siland, tjeld, vipe, småspove, raudstilk, fiskemåse, hettemåse, sildemåse, gråmåse, svartbak, makrellterne, raudnebbterne og teist. Tennøyane er eit tidlegare egg- og dunvær med bra bestandar av fleire målsartar. Begge øyane vert brukt til husdyrbeite, noko som har halde vegetasjonen i hevd. Delar av lyngen er likevel i ferd med å bli grovvaksen og mindre eigna for sjøfugl.

Føremålet med vernet er å gje sjøfuglane gode og trygge livsvilkår og å ta vare på ein viktig hekkelokalitet med naturleg tilhøyrande vegetasjon og dyreliv. Verneforskrifta forbyr all skade på vegetasjon og dyreliv, og det er ikkje tillate å setje i verk tiltak som kan endre dei naturlege tilhøva. I perioden 1. april til 31. juli er det forbod mot ilandstiging og ferdsel på landareal og i ei sone på om lag 50 meter frå land. Lågtflyging under 300 meter er òg forbode. Tradisjonelt sauebeite og naudsynt ferdsel i samband med dette er likevel tillate, det same gjeld yrkesfiske for manntalsførte fiskarar.