Kolebakkane

Kolebakkane naturreservat ligg nord for Breimsvatnet i Gloppen kommune i Vestland, i fjellsida mellom 200 og 600 meter over havet. Reservatet dekkjer eit totalareal på 4 487 dekar og vart freda ved kgl.res. 17. desember 1999.

Området har varierte terrengformer og eksposisjonar som gir grunnlag for mange ulike skogtypar. Mosaikken av myr, furuskog og bjørkeskog er særmerkt for dei høgareliggjande og slake skråningane. I dei brattare liene er furuskog oppblanda med lauvtre, særleg bjørk og osp. Delar av skogen har eit gammalt og opphavleg preg med tre i alle aldersgrupper og mykje gadd.

Formålet med fredinga er å sikre eit stort og lite påverka furuskogsområde med alt naturleg plante- og dyreliv.

Verneforskrifta forbyr mellom anna hogst, innføring av nye plante- og dyreartar, terrenginngrep, motorisert ferdsel og organisert idrettsbruk. Det er likevel tillate å sanke bær og matsopp, jakte, fiske og beite på eit nivå som ikkje skader fredingsformålet. Forvaltningsstyresmakta kan etter søknad gje løyve til mellom anna merking av stiar, fjerning av framande treslag og avgrensa bruk til undervisning.