Tungevåg

Tungevåg naturreservat ligg nordvest på Ytre Stadlandet i Stad kommune, Vestland, og vart freda ved kongeleg resolusjon 20. desember 1991. Reservatet er ein saltvasspoll på om lag 615 dekar, der nesten heile arealet er sjøareal.

Stadhavet er eit av dei mest verharde kystavsnitta i Noreg, og Tungevågen har ein særleg viktig funksjon som ly for fuglar i uversperiodar. Området er først og fremst av ornitologisk interesse som trekk- og overvintringslokalitet for våtmarksfugl. Det er registrert 55 artar av våtmarksfugl, mellom anna havelle, ærfugl, svartand og skarvar. Kvart år overvintrar 10–20 songsvaner i området.

Føremålet med fredinga er å ta vare på eit viktig våtmarksområde med naturleg tilhøyrande vegetasjon og dyreliv. Verneforskrifta forbyr all skade på vegetasjon og dyreliv, jakt og fangst, motorisert ferdsel på vatnet og lågtflyging under 300 meter. Det er òg forbode å gjennomføre inngrep som kan endre dei naturgjevne tilhøva. Fiske og bruk av motorbåt i samband med dette er likevel tillate, det same gjeld bruk av motorbåt for grunneigarar ved tilkomst til naust. Statsforvalteren i Vestland er forvaltningsmyndigheit for reservatet.