Bøyaøyra

Bøyaøyra naturreservat ligg ved utløpet av Bøyaelva inst i Fjærlandsfjorden i Sogndal kommune i Vestland. Reservatet dekker eit totalareal på om lag 230 dekar, der 94 dekar er landareal og resten er sjøareal. Området vart freda ved kongeleg resolusjon 20. desember 1991.

Deltaet er bygd opp av lausmassar tilført via Bøyaelva, som har eit stort nedbørsfelt med tilsig frå mellom anna Jostedalsbreen. Naturfagleg er området verdifullt som våtmarkslokalitet med fleire klart avgrensa vegetasjonssoner og rikt utvikla strandeng. Det er registrert 92 fugleartar i området, og nær 40 av desse er våtmarksfuglar. Området har særleg verdi som rasteplass under vårtrekket for ande- og vadefuglar.

Verneføremålet er å ta vare på deltaområdet som naturtype, både geomorfologisk og med omsyn til strandeng og våtmarksfugl. Verneforskrifta forbyr all skade på vegetasjon og dyreliv, inngrep som kan endre naturtilhøva, motorisert ferdsel, camping og telting. All ferdsel i reservatet er forbode frå 1. april til 1. august. Tradisjonell jordbruksdrift, slått, beite og fiske er likevel tillate. Statsforvalteren i Vestland er forvaltningsmyndigheit.