Sogneoksen

Sogneoksen naturreservat ligg sørvest i Sognesjøen i Gulen kommune og består av holmane Sogneoksen og dei to Kråkene. Sogneoksen er ein kuppelforma bergknaus med tynt jordsmonn og relativt rik flora, medan Kråkene er låge holmar som fungerer som kvileplassar for fugl.

Området er ein viktig hekke-, trekk- og overvintringslokalitet for sjøfugl. Hekkande artar inkluderer ærfugl, svartbak, gråmåse, sildemåse og raudnebbterne. Reservatet har klart seg betre enn mange andre sjøfuglreservat i fylket, men bestandane er likevel reduserte for nokre artar etter næringssvikten etter år 2000. Som døme hekka det 160 par gråmåse i 1995, mot berre 45 par i 2010.

Reservatet vart verna ved kongeleg resolusjon 28. mai 1993. Verneforskrifta forbyr all skade på vegetasjon og dyreliv, og det er forbod mot inngrep som kan endre dei naturlege tilhøva. I hekketida, frå 1. april til 31. juli, er det forbod mot ilandstiging og ferdsel på land og i ei sone på om lag 50 meter frå land. Lågtflyging under 300 meter er også forbode. Unntaka frå reglane gjeld mellom anna militær verksemd, redningsteneste, tradisjonelt sauebeite og yrkesfiske. Forvaltningsansvaret ligg hos Statsforvalteren i Vestland.