Mågøyane

Mågøyane naturreservat ligg i Solund kommune i Vestland, vest av Storøy i Ytre Sula. Reservatet består av to øyar, Nordre Mågøy og Søre Mågøy, og dekkjer eit totalareal på om lag 269 dekar, der om lag 92 dekar er landareal. Begge øyane er sterkt vindeksponerte, og vegetasjonen er dominert av gras, medan Søre Mågøy i tillegg er prega av fjell i dagen.

Området er verna som ein viktig hekkelokalitet for sjøfugl. Registrerte hekkande artar inkluderer tjeld, steinvendar, svartbak, gråmåse, sildemåse, fiskemåse, makrellterne og raudnebbterne. På 1970- og 80-talet var hekkebestandane relativt store, men sidan har talet på hekkande fugl minka betydeleg, truleg fordi fuglane i vanskelege tider samlast på dei beste hekkeplassane i nærleiken, som Gåsvær og Utvær.

Verneforskrifta vart fastsett ved kgl.res. 28. mai 1993. All vegetasjon og alt dyreliv er verna mot skade og øydelegging, og det er forbode å setje i verk tiltak som kan endre dei naturlege tilhøva. I perioden 1. april til 31. juli er det forbod mot ilandstiging og ferdsel på landareal og i ei sone på om lag 50 meter frå land. Lågtflyging under 300 meter er òg forbode. Taretråling er tillate i perioden 1. august til 31. mars, og jakt er tillate frå 10. september til 31. mars.